Jiäkur'oi

Jiäkur'oi

Jiäkur'oi

Jiäkur’oi on talvisportukiža.

Jiäkur'oin perindö Ven'al

Ven’al täs sportulajis on ylen hyvät perindöt. Meijän muan jiäkur’oih kižuajien joukkoveh da iče kižuajat ollah kuulužat kogo muailmas. Min kerduahäi hyö oldih voittajat kaikis suurimis kilvois. Meijän rahvas ainos vuotetah heijän voittuo. Kengo televiizoras kaččou kižoi, kengo kävyy kannattamah sportumiehii toizih linnoih da mualoih, kus hyö kižatah. Stadionoil vierahis mualois ainos suau nähtä meigälästy.

Jiäkur'oin histouries

Tiijätgo, ketbo enzimäzet ruvettih kižuamah jiäkur’oih? Sanotah, ku Kanuadan rahvas. Jiäkur’oi on kuulužu kiža Pohjas-Amerikas: Kanuadas da Yhtysvallois. Ei jällele jiä Jevrouppugi. Hyvät jiäkižuajien joukot ollah ruoččilazil, suomelazil, čeehielazil. Meijän joukkoveh yhtelläh on kaikis tundiettuvin da enin kilbua voittanuh. Enzi kerdua meigäläzet – sillozen Nevvostoliiton joukkoveh – voitettih Muailman jiäkur’oih kižuajien kilvat vuvvennu 1954. Net oldih Ruočin piälinnas Stokgol’mas. Pidäy sanuo: silloi meigäläzet enzi kerdua tuldih muailman čempionuattah. Kahten vuvven peräs hyö suadih voitto jo Olimpiiskolois kižois. Kaikkiedah Nevvostoliiton jiäkur’oih kižuajat voitettih 22 kerdua Muailman kilvois, Olimpiiskolois kižois – kaheksa kerdua. Nevvostoliiton jatkai – Ven’an joukkoveh – viizi kerdua oli paras Muailman kilvois, vuvvennu 1993, sit 2008, 2009, 2012 da 2014. Tänävuon meigäläzet voitettih finualas suomelazii.

Siännöt

Hokkeih libo jiäkur’oih kižatah avvonazel jiäl libo luistelikol. Hokkeih kižatah kahtel joukkovel, kuuzin kižuajoin joga joukkoves. Kižuajoil pidäy jiäkur’oipualikoil lykätä jiäkur’oi toizen joukkoven hokkeivorottoih. Yksi kižuaju joga joukkoves puolištau omii vorottoi. Hänel pidäy tavata jiäkur`oi, ei laskie omih vorottoih. Voittau se joukkoveh, kudai lykkiäy toižien vorottoih enämbän jiäkur’oidu, a omih vorottoih ei anna lykätä.