Kert, Georgij Martinovič

Kert, Georgij Martinovič
Ammatti:	kielitieteilijä
Rodivui:	1. tuhukuudu 1923(1923-02-01)
Roindukohtu:	Lomonosovin piiri[d], Nevvostoliitto
kanzalližus:	Nevvostoliitto  Ven'a
Kuoli:	26. syvyskuudu 2009(2009-09-26) (86 года)
Kuolendukohtu:	Petroskoi, Ven'a

Georgij Martinovič Kert (1. tuhukuudu 1923 – 26. syvyskuudu 2009) oli nevvostoliittolaine da ven’alaine kielentutkii, Ven’an itämerensuomelazien da saamen kielien specialistu, Ven’an socialistizen federatiivizen nevvostotazavallan arvostettu tiedoruavon ruadai, monien kniigoin kirjuttai.

Eloskerdu

Georgij Kert rodivui 1. tuhukuudu vuvvennu 1923 Kamenkan hieruh Leningruadan alovehel. Häi oli Ižänmuallizen voinan ozanottai, Ižänmuallizen voinan 1. astien kunnivomerkin kavaleru.

Vuvvennu 1950 Kert loppi ruskien diplomanke Leningruadan valdivonyliopiston filolougiellizen tiedokunnan, vuozinnu 1950-1953 häi opastui aspirantuuras Nevvostoliiton Tiedoakadiemien kielitiijon instituutas, sit väitti kandiduattudissertacien (1953). Vuvves 1953 Georgij Kert rubei ruadamah Karjalan Tiedoakademien kielen, literatuuran da histourien instituutas. Vuozinnu 1959-1986 häi oli Kielitiijon ozaston johtajannu. Vuvvennu 1972 häi väitti doktorudissertacien. Kert opasti saamen da suomen kieldy Petroskoin da Piiterin yliopistolois.

Vuvves 1973 algajen Kert oli suomelasugrilazien Komitietan Nevvoston da Ven’an tiedoakadiemien paikannimistön Nevvoston ozanottajannu.

Georgij Kert oli Karjalan avtonoumizen socialistizen nevvostotazavallan (1973) da Ven’an socialistizen federatiivizen nevvostotazavallan (1983) arvostettu tiedoruavon ruadai, häi oli palkittu kunnivomerkil omas arvotegolois. Vuozinnu 1997 – 2004 häi toizien karjalazien tiedomiehienke projektiiruičči TORIS – Ven’an luodehen paikannimistön tiedoperustua, kuduan tiijot sit kerättih teidokonehen programmas da verkosivul toris.krc.karelia.ru.

Kert kuoli 26. syvyskuudu vuvvennu 2009 Petroskois.