Nikolai Zaitsev

Lähteh Wikipedii
Siirry navigaatioon Siirry hakuun
Nikolai Zaitsev
Rodivui: 16. talvikuudu 1938(1938-12-16) (80 лет)

Nikolai Zaitsev (16. talvikuudu 1938) on tundiettu karjalaine kirjuttai da taideilii. Häi kirjuttau omii tevoksii karjalan kielen livvin murdehel.

Eloksenkerdomus[Kohendele | Kohendele tekstua]

Nikolai Zaitsev on roinnuhes 16. talvikuudu vuvvennu 1938 Alavozen alovehen Antilan kyläs, Anuksen piiris. Školan jälles ruadoi Alavozen meččyzavodal. Jo lapsennu olles ylen suvaičči piirustua. Vuvvennu 1960 Nikolai loppi Moskovan Rahvahallizen Taidoyliopiston. Omah mučoih Galinah N. Zaitsev tuttavui vuvvennu 1963 Alavozen kluubas, nuoret kerras miellyttih toine toizeh, nenga sovus da rakkahuos eletäh 45 vuottu. Yhtes hyö kazvatettih kaksi poigua, nygöi autetah kazvattua bunukkoi. Nikolai Petrovič sanou, ku pereh kannattau händy kaikis ruadolois. Nikolai Zaitsev ruadoi meččyzavodal. Nygöi on eläkkehel da eläy Anuksenlinnas. Vuvves 2005 algajen rubei kirjuttamah kerdomuksii, novelloi. Novellois Nikolai Petrovič kuvaillou omua muadu, Karjalan hieruloin histouriedu. Novelloin piäaihiennu on karjalaine ristikanzu, hänen hengi, mielet, duumat, tahtot, ilot da igävät.

Toimindu literatuuran alal[Kohendele | Kohendele tekstua]

Vuvvennu 2006 Nikolai Zaitsev kirjutti oman enzimäzen Čuajumagari-kerdomuksen. Sen jälles päivänvalgien nägi vie 14 piendy da suurdu kerdomustu. Viizi niilöis on kerätty kirjuttajan enzimäzeh Omat ikkunat- kniigah, kudai piäzi ilmah vuvvennu 2009. Vuvvennu 2014 Petroskois piäzi ilmah kerdomuksien kogomus Katkattu oza. Nikolai on sen kniigan taidoilii. Hänen tevoksien piätiemannu on ristikanzu, kudaman kauti kirjuttai sanelou vaigielois histouriellizis tahahtumis: voinis, kollektivizatsies, repressielois sego voinan jälgehizes vuozis. Tevokset on kirjutettu iče Nikolai Zaitsevan, hänen buaban da died`oin elaigufaktoin pohjal. Nikolain Zaitsevan kerdomukset äijäl kosketah syväindy. Kirjuttai nerokkahasti, kielastamattah da liijoittelemattah ozuttau karjalazien elaigua da tabua.Vuozinnu 2008 da 2011 on suannuh Vladimir Brendojevan nimizen palkindon.

Toimindu taideilijannu[Kohendele | Kohendele tekstua]

Paiči kirjutusruaduo N. Zaitsev on nerokas taideilii. Piirustua häi algoi školas, konzu opastui kolmandes kluasas. Piirustuskerhos hänel oli nerokas opastai Leonid Korhonen; kuduas häi äijäl mih opastui. Sit nämmä tiijot päittih hänele Moskovan taidoyliopistos opastujes. Mondu vuottu Nikolai Zaitsev ruadoi mainostaidoilijannu. Kogo elaijas hänel suitui suan kuvua. Erähät niilöis pandih ozutettavakse Anukses, Alavozes sego Petroskois.

Lähtehet:[Kohendele | Kohendele tekstua]

1. Kniigu "Katkattu oza" (Verso, 2014)

2. Kuzmina Olga. Luonnon helmas kazvanuh kirjuttai //Oma mua №50/2013.-s.3

3. Libertsova.V. Pädis tarattua livvikse// Oma mua №13/2012. -s.5

4. Libertsova V. Nikolai Zaitsevan kirjavu muailmukuva //Taival-almanakku 2013. -s.44 -47