Ole Einar Bjorndalen

Ole Einar Bjorndalen
Ammatti:	ampumahiihtäjä, maastohiihtäjä, biathlon coach
Rodivui:	27. pakkaskuudu 1974(1974-01-27) (50 лет)
Roindukohtu:	Drammen[d], Buskerudin lääni[d], Norviegii
kanzalližus:	Norviegii
Ukko / akku:	Darja Domratševa[d]

Ole Einar Bjorndalen (27. pakkaskuudu 1974) on norviegielaine hiihtoambui, Olimpiadukižoin, Muailman kilvoin da Muailman sportumal’l’an kilvoin histouries kaikis enimäl arvonimie suannuh. Olimpiadukižois Bjorndalen sai 13 medalii, niilöin luvus kaheksa kuldumedalii, Muailman kilvois sai 20 kuldumedalii da kuuzi kerdua häi oli Muailman sportumal’l’an omistai. Vuvven 2002 Olimpiadukižois Salt Lake Citys Bjorndalen rodih voittajakse kaikes nelläs hiihtoammundan lajis da rodih ainavokse muailmas ehtottomakse Olimpiadukižoin čempionakse hiihtoammundas. Bjorndalen iče oli 96 kerdua voittajannu hiihtoambujien da hiihtäjien kilvois Muailman sportumal’l’an suamizekse (95 hiihtoammundas da kerran hiihtändäs). Kaikkiedah niilöis hänel on 133 voittuo, sih luguh kuulutah myös voitot joukkovehlajilois.

Vuozinnu 2014-2016 Bjorndalen kuului Kanzoinvälizeh Olimpiadukomitiettah.

Bjorndalen on hiihtoammundas ijäkkähin Muailman sportumal’l’an kilvoin da Olimpiadukižoin voittai (hänel oli 41 vuottu, 10 kuudu da 5 päiviä).

Eloskerdu

Bjorndalen on roinnuhes Norviegien Drammen-linnah fermeroin pereheh. Opastundu ei ylen äijiä kiinnostunnuh händy, enin aigua häi vietti sportukerholois. Kižai jalgumiäččyh, kävyi käzimiäčyn harjaitteluloih, lykii keijästy, yhtyi pyörysportan da kebjien atletiekan (3000 metrin juoksu) kilboih. Hänen tuattah sežo harjaitti kebjiedy atletiekkua, ga hänel pidi jättiä sportu piän elättämizekse. Bjorndalenal on kaksi vellie da kaksi sizärdy. Vahnin velli Dag enzimäzenny perehes rubei harjaittamah hiihtoammundua, hänen jälgilöile sit lähti Ole Einar.

Tänäpäi Bjorndalen eläy Avstrien Obertilliachas Tirolin federualumuas.

Vuvvennu 2006 oraskuun 27. päivänny Bjorndalen nai belgielazes (itualielastu juurdu olii) hiihtoambujas Nathalie Santeras. Lastu heil ei olluh. Ligakuul 2012 oli ilmoitettu, ku Nathalie da Ole Einar erotah jälles kuuttu vuottu yhtehmendyy. Vuvvennu 2016 kezäkuun 16. päivänny Bjorndalen nai kuulužas valgoven’alazes hiihtoambujas Darja Domračevas. Heile rodih tytär 1. ligakuudu vuvvennu 2016 Minskas, kudamale annettih nimi Ksenija.

Omat tiijot

• Bjorndalen maltau norviegien, anglien, germuanien, itualien da ven’an kielii.
• Vuvves 1984 harjaittau hiihtoammundua.
• Vuvves 1992 kuuluu Norviegien joukkoveheh.
• Hänen harjaittelijat – Rogger Grubben da Joar Himmle.

Mieldykiinnittäjiä tieduo

Bjorndalen sissäh pidäy huoldu puhtahuos da omas tervehyös, sendäh keräl ainos ottau pölynimurin da harvah konzu andau kätty tervehtijes. Häi sanoi, ku pölynimurinke ajelendu ei olluh hänen idei, häi rubei ruadamah sidä joukkovehen ystävien peräh.

Joukkovehes hiihtoammundu

Bjorndalen oli 35 kerdua voittajannu joukkovehkilvois, kilbujuoksulois da naizien da miehien yhtehizis kilbujuoksulois. Se on rekordulugu.

Sportumiehen palkindot

• 1998 – Aftenposten-lehten kuldumedali
• 2002 – Egebergs-palkindon laureattu
• 2009 – Fair play -palkindon laureattu
• 2011 – Holmenkollenan medali (Norviegien suurin palkindo hiihtäjile suures panokses sportah da korgielois tuloksis)
• 2014 – Kanzallizien olimpiadukomitiettoin assotsiatsien palkindon laureattu