Slavmo

Lähteh Wikipedii
Siirry navigaatioon Siirry hakuun
Slavmo
Slavmo

Slavmo on Karjalan tazavallan suuri laitos, kudai muokkuau maiduo. Enne zavodu oli Kirovan uuličal. Täs muokattih 10 tonnua maiduo yhtes vuoros. Nygöi kombinuatan vägevys kazvoi – tänä piän se on 100 tonnua yhtes vuoros. Nygyaigaine laitos tuli käyttöh talvikuus v. 1983.

Täyzi nimi on vuitinomistaiyhtymys ”Slavmo” (ven. Акционерное общество «Славмо», АО «Славмо»). Sen adressi: Karjalan tazavaldu, Petroskoi, ul. Antonova, 1. Laitoksen piäjohtai on Masl’akov Sergei Nikolajevič.

Laitokseh kuulutah ”Slavmo” da ”Karel’skaja žemčužina” (ven. Карельская жемчужина), kudai on vien luadumerki.

Kombinuatas ruadau läs 380 hengie.


Histourii[Kohendele | Kohendele tekstua]

Petroskois ruvettih muokkuamah maidotuottehii jo XX-luvun allus. Vuonnu 1913 täs oli kaksi piendy zavodua, kuduat luajittih voidu. Vie oli pieni laitos, kudamas muokattih maiduo, ga sen tuottehii täydyi vaigu bol’ničoile da päivykodiloile. Vuonnu 1952 piätettih rakendua maidozavodu. Sidä kučuttih ”Gormolokozavod”. Se rubei ruadamah vuvven 1956 allus. Sit tapahtumas algau Petroskoin maidokombinuatan histourii. Enne zavodu oli Kirovan uuličal. Vuonnu 1956 täs enzikerran muokattih 10 tonnua maiduo yhtes vuoros. Linnas myödih maiduo, kefiirua, hapainmaiduo, majendettuu ruahtuo, ruahtuo, kannatestu, sliuhkua, jiämaiduo.

Enzimäi laitos oli pieni da sijoittui Petroskoin keskustas. Ga rahvahan lugumiäry kazvoi da pidi enämbi maidotuottehii. Vuonnu 1983 Kl’učevajan lähevös Antonovan uuličal rakendettih uvvet huonukset. 31. pakkaskuudu vuonnu 1983 ”Petroskoin maidozavodua” ruvettih kuččumah ”Petroskoin maidokombinuatakse”. Yhtes vuoros maiduo muokattih 110 tonnua. Maidotuottehii myödih st’oklahizis butilkois (0,5 litrua) da bankazis (0,2 kg).

Vuvves 1991 algajen maidozavodu ruadau muailman kompuanienke ”Tetra Pak”, kudai luadiu pakuičusmaterjualua. Sendäh kombinuattu enämbiä ei käytä st’oklupakuičustu.

26. kevätkuudu vuonnu 1993 ”Petroskoin maidokombinuattu” pandih kirjale vuitinomistaiyhtymyksekse. Piäjohtajannu on Masl’akov V.N.

Vuonnu 1996 pandih kirjale luadumerki ”Slavmo”. Nygöi Petroskoin maidokombinuattu on Karjalan suurin laitos, kudai muokkuau maiduo. Sen tuottehii tundietah ei vaigu Karjalan tazavallas, ga sen rajoin tagua. Laitoksen nimes on kombinuatan luadumerkin merkičys. ”Slavmo” merkiččöy ”maineh maijole” libo ”kunnivolline maido” (ven. «Слава молоку» libo «Славное молоко»).


Kombinuatan tuottehet[Kohendele | Kohendele tekstua]

Tänäpäi Slavmo luadiu maidotuottehii, minerualuvetty da juomistu. Sidä myvväh Karjalan tazavallan piirilöis, Moskovas da Murmanskan da Leningruadan alovehel.

Maidotuottehet ollah:

  • maido
  • kannates
  • ruahto
  • argivoi
  • kefiiru
  • fruktukefiiru (abrikousanke, vagoinke da must’oinke)
  • r’aženku
  • bifiduokku
  • herajuomine ”Sila” (ruahtomaijonviespäi luajittu). Se voi olla ananassu- libo apel’siinujuomine.

Juomizet:

  • minerualuvezi
  • limonuadu
  • marjuvezi (buolu, viišn’umarju, garbalo)
  • mehu (juablokkumehu)

Maiduo muokattavakse otetah kymmenel fermeralpäi, kuduat eletäh Karjalan tazavallas. Maiduo tuvvah kombinuattah läs 60 tonnua päiväs.

Minerualuvetty tuvvah laitokseh mualoukkoloispäi, kuduat sijoitutah Karjalan tazavallan Oniegan rannikon piiris. Päiväs vetty tuvvah 35 tonnua.