Tilkuzet

Tilkuzet on videleläine teatru, kudai ozuttau spektakliloi karjalan kielel.

Perustandu

Tilkuzet on perustettu vuvvennu 2007 vahnah karjalazeh kyläh Videleh. ”Nygöi karjalazet vähän paistah omal kielel. Huijustellahes. A kedäbo on huigei? Omii muamoloi da tuattoloi, kudamat annettih meile eloksen da nimen – karjalazet? Karjalan kieli on ”voimatoi”. Kodvazen peräs, eihäi rahvas roittane pagizemah, se häviey”, kirjuttau Tilkuzien ohjuaju Raisa Kudžijeva. Se oli tärgei syy teatrujoukon perustandale.

Ohjuaju

Tilkuzien alallizennu ohjuajannu on karjalaine Raisa Kudžijeva, kudai on kaikkien Tilkuzien spektakloin käzikirjutuksien luadijannu da nerokkahannu artistannugi.

Artistat

Kai artistat ollah videläläzet, karjalan kieldy maltajat da pagizijat. Suuri joukko artistoi on Videlen školan opastajii.

Spektaklit

Tilkuzet ozutetah spektakliloi karjalan kielen videlen murdehel. ”Ezityksis kerrommo, kui ennevahnas elettih hierun rahvas. Mustelemmo, midä olemmo kuulluh da nähnyh lapsennu. Ezityksien pohjannu ollah ven’ankielizet tevokset, kudualoi kaikin tundietah da suvaijah. Myö kiännämmö niidy karjalakse, sille kielele, kudamal paistah Videlen čupul. Meijän kieli on vähäzel tostu luaduu, kui toizis kohtis”, kirjuttau Raisa Kudžijeva.

Tilkuzet on luajittu nelli spektaklii karjalan kielel.

• ”Rakkavus da kyyhkyzet”. Pohjannu on kuulužu ven’alaine fil’mu.
  
• ”Samvaaru”. Sen pohjannu on Juakko Rugojevan samannimine kerdomus.
  
• ”Vieras koin ižändy” . Pohjannu on Vasilii Firsovan samannimine kerdomus.
  
• ”Videlen kadrieli”. Pohjannu on kuulužu ven’alaine fil’mu ”Kadril’”.
  

Joga Tilkuzien spektaklis on karjalastu pajuo da tansii. Artistoin ruutat da kai spektakliloin vehkehet da lomut ollah hierulazet. Laval ollah tovellizet karjalazet tabua da syväinjuurii myöte. Heijän karjalan kieli on puhtas da oigei, rikas da kuvannolline.

Matkustandu

Tilkuzii tundietah Karjalan tazavallas da sen ulgopuolel. Artistat kävväh ozuttamah omii spektakliloi karjalazih kylih, oldih ezittymäs Petroskois Kanzallizes teatrasgi. Omua neruo kävväh ozuttamah Suomehgi.

Kirju

Vuvvennu 2013 Tilkuzet piästettih ilmah kirju "Videlen ”Tilkuzien” kummii". Kirjah on otettu nelli teatran ozutelmua da niilöis kuulujua pajuo. Kirjah on pandu artistoin kuvuagi. Teatran enzimäine kirju on luajittu Videlen karjalazet -yhtistyksen, Intra-fondan da Anuksen maidozavodan varoil.

Diskat

Tilkuzet luajitah omien spektakliloin dvd-fil’mat.

Linkit

Tulkuzet vkontakte-saital: https://vk.com/club7478563