Vladislav Tretjak

On otettu Wikipedii-späi
Vladislav Tretjak
Portriettu
Ammatti: jiäkur’oihkižuaju, poliitiekku
Rodivui: 25. sulakuudu 1952(1952-04-25)[1][2] (71 год)
Roindukohtu:
kanzalližus:

Vladislav Tretjak (25. sulakuudu 1952) on nevvostolaine jiäkur’oihkižuaju (vratari), harjaittelii, Ven’an valdivonvallas da poliitiekas ruadai, Ven’an Valdivon Duuman IV-VII kučundukerähmölöin deputuattu Yhtenäine Ven’a -puolovehespäi. Vuvves 2006 on Ven’an jiäkur’oihkižuajien federatsien piämies.

Vuozinnu 1969-1984 oli Armien keskuskluuban da Nevvostoliiton joukkovehen vratarinnu. Nevvostoliiton kilvois kižai 482 mačas, Muailman kilvois da Olimpiadukižois – 117 mačas, Kanuadan sportumal’l’an kilvois – 11 mačas.

Lapsestus da nuorusaigu[kohenda | kohenda tekstu]

Tretjak on roinnuhes Orudjevo-kyläh Moskovan alovehel. Vie lapsennu rubei harjaittamah sportua. Vahnemban vellen peräh rubei uidelemah Dinamo-uinduallikos, sit kiinnostui vedeh hyppävyksih (hyppäi 5-metrin korgevuos). Yhtes vahnembienke joga pyhiäpäiviä kävyi luistelikole.

Kižuamah jiäkur’oih Tretjak rubei 11-vuodizennu Armien keskuskluuban lapsien da nuorižon sportuškolas. Sinne händy vedi muamah. Ezmäi häi oli hyökkiäjänny, sit vratarinnu.

Tuatto ei kannatannuh poijan kiinnostustu, sanoi, ku jiäkur’oihkižuaju on ku pihankabrastai vastanke. Lauhtui, konzu poijale oli jo 15-16 vuottu igiä. Silloi Vladislav rubei tuomah kodih enzimäzii dengoi, kudamii hänele maksettih kižois.

Kezäl 1967 nuordu vratarii huomai kuulužu Armien keskuskluuban harjaittelii Anatolii Tarasov. Tretjak rubei harjaittelemah yhtes ammatillizien sportumiehienke. Heinykuun puolivälis joukkoveh lähti suveh, a Tretjak tuli järilleh nuorižon joukkoveheh. Yhtes joukkovehenke häi rodih Moskovan čempoinakse, sai parahan vratarin palkindon. Tädä enne Jevroupan kilvois Nevvostoliiton nuorižon joukkoveh, kus Vladislav oli toizennu vratarinnu, piäzi toizele sijale. Tädä joukkovehen ezitysty ei sanottu lykykkähäkse. Ga vuvven peräs Nevvostoliiton sportumiehet roittih jo voittajikse.

Kavven 1968/69 aigah Tretjak enzi kerdua kižai Armien keskuskluuban puoles Spartak-kluubua vastah.

Enzimäzen kerran Tretjak kižai Nevvostoliiton joukkovehes Izvestija-lehten kilvas vuvvennu 1969 Suomen joukkovehtu vastah.

Sportukarjieru[kohenda | kohenda tekstu]

Vuvvennu 1970 Tretjakua otettih Nevvostoliiton joukkoveheh kižuamah Muailman kilvois. Silloi häi enzi kerdua rodih Muailman čempionakse.

Vuvves 1971 Tretjak jo on Nevvostoliiton joukkovehen piävratari.

Vuvvennu 1972 häi enzi kerdua rodih Olimpiadukižoin čempionakse, kižai kaikis mačois da vähembi kaikkii sai šaibua omih vorotoih. Sil aigua häi oli jiäkur’oihkižuajis nuorin Olimpiadukižoin voittai.

Vuvvennu 1976 Olimpiadukižoin avajazis Tretjak kandoi Nevvostoliiton lippuu da toizen kerran rodih niilöin voittajakse. Vuvvennu 1981 Tretjak da Nevvostoliiton joukkoveh suadih voitto Kanuadan sportumal’l’an kilvois.

Vuvvennu 1984 Sarajevos Tretjak uvvessah rodih Olimpiadukižoin čempionakse da Nevvostoliiton joukkoveh sai kuldumedalit.

Vuvven 1984 talvikuun 22. päivänny Tretjak jälgikerran tuli jiäle, häi lähti jiäkur’oispäi 32-vuodizennu, sendäh ku tahtoi enämbän aigua olla perehenke.

Suavutukset sportas[kohenda | kohenda tekstu]

  • Tretjak kolme kerdua oli Olimpiadukižoin voittai (1972, 1976, 1984), sai hobjumedalin vuvven 1980 kižois.
  • Kymmene kerdua häi oli Muailman čempionannu (1970, 1971, 1972, 1973, 1975, 1978, 1979, 1981, 1982, 1983), sai hobjumedalin nämmis kilvois vuvvennu 1972 da 1976, bronzumedalin vuvvennu 1977.
  • Yheksä kerdua sportumies oli Jevroupan čempionannu (1970, 1973, 1974, 1975, 1978, 1979, 1981, 1982, 1983), sai hobjumedalin nämmis kilvois vuvvennu 1971, 1972 da 1976, bronzumedalin vuvvennu 1977.
  • Sai vuvvennu 1981 Kanuadan sportumal’l’an. Yhtyi nämmih kilboih vuvvennu 1976.
  • Yhtyi Superseerieloih 72, 74 da 76.
  • Tretjak on XX vuozisuan paras jiäkur’oihkižuaju Kanzoinvälizen jiäkur’oihkižuajien federatsien mugah.
  • Tretjak on Kanzallizen jiäkur’oihkižuajien liigan Jiäkur’oin kuulužuon zualan jäsen (händy otettih sih vuvvennu 1989 enzimäzenny Jevroupan jiäkur’oihkižuajis).
  • Enzimäzien joukos vuvvennu 1997 händy otettih IIHFn Kuulužuon zualah.
  • Vuvvennu 2008 Tretjakua otettih IIHFn vuozisuan parahah joukkoveheh.
  • Vuvves 1971 häi on Nevvostoliiton arvostettu sportumuasteri.
  • Viizi kerdua Tretjakua sanottih parahakse jiäkur’oikižuajakse Nevvostoliitos, kolme kerdua – Jevroupas, nelli kerdua – Muailman jiäkur’oihkižuajien kilvoin parahakse vratarikse.
  • Kolmetostu kerdua Tretjak oli Nevvostoliiton čempionannu (1970-1973, 1975, 1977-1984), sai hobjumedalin nämmis kilvois vuvvennu 1974 da 1976 yhtes Armien keskuskluubanke.
  • Sai Nevvostoliiton sportumal’l’an vuvvennu 1963 da 1973, kižai vuvven 1976 finualas.
  • Tretjak on suannuh äijy kunnivomerkii da medalii omas ruavos.

Tretjak kinos[kohenda | kohenda tekstu]

  • Vuvvennu 2007 luajittih fil’mu ”Valerii Harlamov. Kižan ližävöaigu”, Tretjakua ozutti Dmitrii Arosjev.
  • Vuvvennu 2012 – Jiäkur’oinkižat -fil’mu, Tretjakua ozutti Andrei Vorošilov.
  • Vuvvennu 2013 – Legenda №17 -fil’mu, Tretjakua ozutti Aleksandr Pahomov.
  1. [[::d:Q17378135|Третьяк Владислав Александрович]] // Большая советская энциклопедия — Москва: Большая российская энциклопедия, 1969. Проверено 28 сентября 2015.
  2. Encyclopædia Britannica Проверено 9 октября 2017.