Muumi

Lähteh Wikipedii
Siirry navigatsii, eči
Tove Jansson Muumi-kuklazienke vuvvennu 1956.

Muumi (mumin) on suomenruoččilazen kirjuttajan da taidoilijan Tove Janssonan luajittu suarnuolendoloin laji. Tundietuimbii muumihahmoloi on Muumipeigoi, kudai eläy omassah huolettoman da šeikkailunhimozen muumiperehen kel Muumitalois Muuminotkos. Jansson kirjutti ruočin kielel mondu Muumi-kirjua. Kaikes suomelazes lapsienkirjalližuos niilöi ylen äijäl suvaijah da kiännetäh. Muumi-kirjoi on kiännetty 43 eri kielele, da niilöin pohjalpäi on luajittu kui kirjoi da sarjukoomiksoi, mugai mul’tfil’mua, interaktiivistu kirjua, mondu ozutelmua dai ouperu. Muumiloin nouzendah muailmankuulužuoh äijän vaikutettih sežo Tove da Lars Janssonan Muumi-sarjukoomiksat, kudamii jullattih vuvves 1954 ezmäi "The Evening News" — gazietas Londonas da myöhembäh 40 muas 20 miljounale lugijale. Ylen kannatetut muumit ollah Japounies.

Tove Jansson kirjutti dai čomendi kuvil omassah kirjat. Muumit viestitäh harmouniedu. Hos muumimuailmu tavallizesti ongi turvalline, ga sen eläjil toiči rodieu hos midä mugahtembuajua, kudamah näh maksau sanelta. Enzimäine Muumi-tevos oli vuvvennu 1945 ilmah piässyh Småtrollen och den stora översvämningen (”Muumit da suuri viennouzu”, ei kiännetty karjalakse).

Muumihahmot[Kohendele | Kohendele tekstua]

Muumit eletäh Muuminotkos olijas Muumitalois. Muumipereheh kuulutah Muumipeigoi da hänen muamah Muumimami da tuattah Muumitata, sego perehen ottolapsi Nipsu. Muuminotkon eläjih kuulutah sežo ezimerkikse Ninnineidoi, Mymmeli, pieni Myy, Ninnettäi, Vilijonka omissah lapsienke, Muikkuine, Mörgö, Hemuli da Haižuli. Harvembah nähtylöi hahmoloi ollah ezimerkikse Tiedoiniekku, Tuu-tikki, Surku, Jenni-t’outa sego Tiuhti da Viuhti. Sobii muumit ei käytetä, hos Muumimamil ainos ongi piäl peredniekky da Muumitatal omassah piäs tsilindruhattu. Yhtelläh kezoidu kylbijes muumit šuorivutah uindusobih. Muumipeigoi on Tove Janssonan alter ego, ga pieni Myy da Tiuhti sežo ollah häneh päi, hemulitgi. Muumimamin selgienny ezikuvannu oli kirjuttajan muamo. Voijah sanuo, muumiloih äijäl vaikutettih Tove Janssonan oma pereh da dovarišat.